سيبوني أهيس

سيبوني أهيس



سيبوني أهيّس

وأتنّح وأتَيّس

أعيشها بمزاجي

وع الخلق أغَلٍّس

ماقلتش هعفّر

ماقلتش هخمّس

ماقلتش هحشّش

ماقلتش هدبّس

دي كل الحكاية

زهقت أبقى أخرس

دي كل الحكاية

مزاجي كويّس



ميهمش جعان

ميهمش مفلٍّس

وغيري يعبي

فلوسه ويكيّس

أكيد بكره أحسن

وهاكل وأحبّس

وأدلّع دماغي

وأزأز في ترمس

وأدوق الجاتوه

وفي شرم أتشمّس



سيبوني أهيّس

أقول أنا الريس

هنغنغ جيوبكوا

مفيش حد هأحبس

وكفتة هاتاكلوا

وهألغي المدمس

رُفيّع هيطخن

فِشِلَّة هخسّس

فقير مش هاتحصل

وعريان هتلبس

في بيتك هتقعد

وغيرك هيكنس



سيبوني أهيّس

أعاكس وأبسبس

وأنسى إني ميت

مش قادر أتنفس

مش بسمع وأطرش

وأعمى بحسس

معنتش بفكّر

معنتش بركّز

تركّز هتتعب

وتبرِز هتنجِز

فلوسك في إيدك

وعينك بتغمز

تبقى انت راجل

بتعرف تميّز!



بلدنا بتنزل

وسعرك بيرخص

ياعم احنا مالنا

دي دينا بترقص!

وغزة بتصرخ

فلسطين بتخلَص

ياعم انت أطرش

بقولك بترقص!



معاك حق انت

على ايه أنغَّص

حياتي وأدقق

وأركز وأفحص



وقوم بينا يلّا

نروح عند دِعبِس

ونعملها شِلّة

ونقلبها مجلس

نضحك نهزر

نكركر نهيّس

نشغّل موسيقا

نطبّل ونرقص

ونحلم ببكرة

أكيد جاي كويس!





سيبوني أهيّس



سيبوني أهيّس