طز فيهم

ايوه يخفوا و طز فيهم
اللي هانوا أو اهانوا
اللي ضعفوا واستكانوا
اللي سبوا واللي حبوا
يكونوا لعبة بين ايديهم
واللي شدو اجزاء سلاحهم
لجل طبعا يقتلونا
واللي برضه بطيراتهم دمرونا وجوعونا
واللي سرقوا الفرح من عين امهاتنا
واللي رشوا الملح جوه عيون أبونا
واللي حلفوا يسكتونا
وبسكاتنا يلجمونا
وبلجامنا يقلعوا شجر الزتون
يغرسوا فينا الجنون
يزرعوا بيننا الحدود
يحصدوا منا الشهامه
يسرقوا أرض الجدود
واللي برضه جم وحلفوا إن كل الحق ليهم
طز فيهم
طز برضه في اللي طايح في الجميع
اللي فارد جتته بالقوه وعايزنا نطيع
واللي فارض جتته ومبادئه بالموت السريع
واللي مناخيره السخيفه داخله في شئون الكبير
والطفل الرضيع
اللي دمر ذكرياتنا
واللي عقدنا في حياتنا
واللي حولنا بقر
وهو راعي للقطيع
واللي فاكرين التاريخ
راح يزيل دم بإيديهم
طز فيهم
طز برضو ف اللي شدوا الأرض من بين خطاوينا الضعيفه
اللي منعونا الصلا إلا بأدان الخليفه
واللي ظنوا إننا رمه وجيفه
واللي جعلوا مننا في الانتخاب قوة مخيفه
أما بعد الانتخاب
ينقلونا ع الشمال
اللي شالوا من كتابنا كل آيات النزال
واللي صنعوا من جتتنا فرشة بتضلل عليهم
طز فيهم
أيوه فيهم
هما سايقين السفينه
بس برضه هما أصلا خيبه صانعينها بإيدينا
يبقى برضوا طز فينا
فينا قهر وفينا ذل وضلمه بتعصب عينينا
فينا خوف لضماه ظروف والسكوت سلسل ايدينا
وإحنا برضوا من سكاتنا وطول ثباتنا إتنسينا
يبقى برضوا طز فيهم زي برضو طز فينا